-जय पाठक (जे.पी.)
मंसिर १ , २०७२ भरतपुर / नेपाल चिकित्सक संघ र "शान्ति र लोकतन्त्रका लागि पेशागत सञ्जाल" (पापड) चितवनले संयुक्त रुपमा भरतपुरमा एक विशेष अन्तरक्रिया कार्यक्रम सम्पन्न गरेको छ ।
भारतले गरेको अघोषित नाकाबन्दीका कारण देशै भरी इन्धन, खाद्यान्न लगायत समग्र स्वास्थ्य क्षेत्रनै प्रभावित भइरहेको बेला चितवनमा यसले पारेको प्रभाव साथै त्यसबाट पर्न गएको संकटको समाधान गर्ने विकल्पको उपाय बारे छलफल गरिएको छ ।
सो विशेष कार्यक्रममा बोल्दै भरतपुर अस्पतालका मेडिकल सुपरिटेन्डेन्ट डा. केशव भुर्तेलले देशै भरी औषधी लगायत सर्जीकल सामानको समेत अभाव भइरहेको समाचार आइरहेको बेला भरतपुर अस्पतालमा अहिले सम्म औषधी अभावको कारण उपचार नरोकिएको र भविष्यमा संकटको अवस्था आउन सक्ने भन्दै त्यसमा आफू सचेत रहेको बताउनु भयो । साथै स्वास्थ्य जस्तो संवेदशील क्षेत्रमा संकट आउन नदिन राज्यले गम्भीर भएर विकल्पको खोजी गर्नुको साथै समग्र समस्याको छिटो समाधान गर्न समेत अनुरोध गर्नुभयो ।
कार्यक्रममा नेपालको संविधान २०७२ मा स्वास्थ्य सेवा सुविधाबारे समावेश गरिएको विषयवस्तु, एन्टिवायोटिकको उचित प्रयोग, चिकित्सकहरुको आचार संहिता, स्वास्थ्य क्षेत्रमा देखिएका समग्र समस्या, त्यसको समाधानका उपाय साथै स्वास्थ्य सेवा सुविधालाई कसरी गुणस्तरीय, सहज ,शुलभ एवं प्रभावकारी बनाउन सकिन्छ भन्ने बारे छलफल तथा अन्तरक्रिया गरिएको थियो ।
कार्यक्रममा बोल्ने बक्ताहरुले नाकाबन्दीका कारण देशनै संकटमा परिरहेको बेला यस्तै अवस्था रहिरहने हो भने निकट भविष्यमा स्वास्थ्य क्षेत्रमा समेत चरम संकट आउन सक्ने भन्दै त्यसको लागि समयमै दीर्घकालिन समाधान खोज्नु पर्नेमा जोड दिनुभयो ।
कार्यक्रममा ढिलै भएपनि नेपालीहरुको महान पर्व विजया दशमी, शुभ दीपावली एवं आज परेको छठको अवसरमा शुभ कामना आदान प्रदान समेत गरिएको थियो ।
चिकित्सक, पत्रकार, वकील, शिक्षक, प्रध्यापक, इन्जिनियरहरुको सहभागिता रहेको सो कार्यक्रम नेपाल चिकित्सक संघ चितवनका अध्यक्ष एवं पापड चितवनका संयोजक डा. कृष्ण प्र. पौडेलको अध्यक्षतामा सम्पन्न भएको थियो ।
- पाठक हेल्थ खबर -स्वास्थ्य सम्बन्धी सम्पूर्ण खबर ( A single CLICK for a complete solution )
No comments:
Post a Comment