अस्पतालका मेसु डा. पौडेलले गरे महिला कर्मचारीहरुलाई अभद्र ब्यबहार

     

भरतपुर अस्पतालका मेडिकल सुपरिटेण्डेन्ट डा. विजय पौडेलले अस्पताल हाताभित्र मादक पदार्थ सेवन गर अस्पतालको सघन उपचार कक्ष, प्रशासन र विभिन्न वार्डहरुमा कार्यरत महिला कर्मचारीहरुलाई अभद्र ब्यबहार गरेको भन्दै स्वास्थ्यसंग सम्बन्धित बिभिन्न कर्मचारी संघ संगठनले  संयुक्त बिज्ञप्ति जारी गरि घटनाको निन्दा गरेका छन् ।

     विज्ञप्तिमा घटनाको सत्य तत्य छानविन गरि यथार्थ विवरण बाहिर ल्याउन प्रशासनसंग जोडदार माग गरिएको छ । दोषी मेसुलाई तत्काल कारवाहीको समेत माग गर्दै यस घटनाकोविरुद्ध एकजुट भएर लाग्न महिला अधिकारकर्मी, नागरिक समाज, महिला समूह, उद्योगी ब्यपारी तथा सर्बसाधरणसंग अपिल पनि गरिएको छ ।

      महिला कर्मचारी माथि हातपात गर्दै ढोका थुनेर कसैलाई भने कारवाही गर्ने चेतावनी समेत दिएको बताईएको छ । घटनाको विरोध गर्नेमा नेपाल स्वास्थ्यकर्मी संघ चितवन, अखिल नेपाल प्रगतिशिल स्वास्थ्यकर्मी संगठन चितवन, अखिल नेपाल जनस्वास्थ्यकर्मी महासंघ चितवन, नेपाल स्वास्थ्यकर्मी संघ केन्द्रिय कमिटि, अस्पताल विकास समिति कर्मचारी युनियन र नेपाल निजामती कर्मचारी युनियन रहेका छन् । उनीहरुले बिज्ञप्तिमा देशभर महिला हिंसा बिरोधी अन्दोलन भईरहेका बेला जिम्मेवार पदमा बसेको चिकित्सकले गरेको कार्य निन्दनिय रहेको बताएका छन् ।

डा.पौडेललाई हालै मात्र मेडिकल सुपरिटेण्डेन्टमा नियुक्त गरिएको थियो । यस विषयमा मेसु पौडेलले कुनै प्रतिक्रिया दिनचाहानु भएन ।