मृगौला प्रत्यारोपण सुरु गरेको तीन वर्षपछि पहिलोपटक कलेजोको सफल प्रत्यारोपण

२०७३ मंसिर २३ ( बिहीवार ) भक्तपुर /  मानव अंग प्रत्यारोपण केन्द्रले मृगौला प्रत्यारोपण सुरु गरेको तीन वर्षपछि मुलुकमै पहिलोपटक कलेजोको सफल प्रत्यारोपण गरेको छ। केन्द्रमा भक्तपुरका ३६ वर्षीय बलराम नागाको कलेजो प्रत्यारोपण गरिएको हो। उनकी दिदी ४१ वर्षीया सानुमाया लागेजुले कलेजो दान गरेकी थिइन्।

       स्वास्थ्य मन्त्रालयले ल्याएको मानव अंग प्रत्यारोपण नियमावली २०७३ ले कलेजो प्रत्यारोपणसँगै मस्तिष्क मृत्यु भएकाहरूको आठवटा अंग लिने र प्रत्यारोपण गर्ने बाटो खुला गरेपछि हालको प्रत्यारोपण सम्भव भएको हो। अब मुटु र फोक्सो प्रत्यारोपणको लक्ष्य लिइएको केन्द्रले जनाएको छ। हाल मुलुकमा बर्सेनि करिब एक हजार जनाको कलेजो फेल हुने आकलन विज्ञहरूको छ।

      दक्षिण कोरियाको सियोलस्थित सामसुङ मेडिकल सेन्टरबाट आएका पाँच जना विशेषज्ञको सहयोगमा कलेजो प्रत्यारोपण गरिएको थियो। शल्यक्रियामा केन्द्रका निर्देशक डा. श्रेष्ठको नेतृत्वमा डा.मोहनदेव भण्डारी, डा.प्रवीण जोशी, डा.सम्पूर्णमान तुलाधर संलग्न थिए। यस्तै एनेस्थेसिया र सघन उपचारमा डा.सुवास आचार्य, डा.आरती राई, डा.महालक्ष्मी देउजा, डा.किरण अधिकारी, डा.सन्दीप भण्डारी र डा.मिलन थापा थिए। पेट र कलेजो विशेषज्ञहरूको नेतृत्व डा.दीपेश गुरुवाचार्य र डा.नीरज जोशीले गरेका थिए।

     नर्सिङ टोलीको नेतृत्व इन्दिरा प्रधानले गरेकी थिइन् भने कलेजो रोग विशेषज्ञ डा.दिलीप शर्मा, डा.सुधांसु केसी, डा.अनन्त श्रेष्ठ, डा.विनीता जोशीले यसमा सहयोग गरेका थिए।मृगौला प्रत्यारोपण सुरु गरेको तीन वर्षपछि केन्द्रमा चिकित्सा विज्ञानमा धेरै जटिल मानिएको कलेजोको प्रत्यारोपण सुरु भएको हो। भारत पुगेर निजी अस्पतालहरूमा कलेजो प्रत्यारोपण गराउँदा एक करोडदेखि डेढ करोडसम्म लाग्ने गरेकोमा अब नेपालमा १५ लाखसम्ममा हुन सक्ने केन्द्रका निर्देशक एवं प्रत्यारोपण शल्यचिकित्सक डा.पुकारचन्द्र श्रेष्ठले बताए। स्वास्थ्यमन्त्री गगन थापाले कलेजो प्रत्यारोपणलाई दिगो बनाउन अझै केही समय विदेशी विज्ञको सहयोग चाहिने बताए। डा. श्रेष्ठका अनुसार विज्ञहरूको यही टोलीले मंगोलियालगायतका देशमा पनि कलेजो प्रत्यारोपण गरेको थियो। ‘अहिले ती देशका आफ्नै चिकित्सक सक्षम भएका छन्,’ उनले भने।

     विज्ञहरूका अनुसार नेपालमा ५० प्रतिशतभन्दा बढीको कलेजो मदिरा सेवनका कारण फेल हुने गरेको छ। त्यसपछि हेपाटाइटिस ‘बी’ र ‘सी’ को संक्रमणले गर्दा कलेजो फेल हुने गरेको छ। मस्तिष्क मृत्यु भएकाहरूबाट दुई वटा मृगौला, दुई वटा फोक्सो, मुटु, प्याङक्रियाज, सानो आन्द्रा, आँखालगायतका आठ वटा मानव अंगलाई अर्को व्यक्तिमा प्रत्यारोपण गर्न सकिन्छ। -अतुल मिश्र/लीला श्रेष्ठ  ( कान्तिपुरबाट साभर )

• पाठक हेल्थ खबर -स्वास्थ्य सम्बन्धी सम्पूर्ण खबर ( A single CLICK for a complete solution )

रेडियो मनकामना १०२.४ मेगाहर्ज

रेडियो मनकामना १०२.४ मेगाहर्ज

http://radiomanakamana.org/live Live Radio-Radiomanakamana

रेडियो मनकामना १०२.४ मेगाहर्ज

रेडियो मनकामना १०२.४ मेगाहर्ज

रेडियो मनकामना १०२.४ मेगाहर्ज

रेडियो मनकामना १०२.४ मेगाहर्ज